Дойду үрдүнэн Улуу Кыайыы 75 сылын бэлиэтээри сылдьабыт. Бу Кыайыы биһиги эһээлэрбитигэр, хос эһээлэрбитигэр чэпчэкитик кэлбэтэҕэ. Эдэр буойун уолаттар сэриигэ олохторун толук уурбуттара. Эйэлээх олохпут туһугар сырдык тыыннарын толук уурбут геройдарбытын өрүү саныыбыт, ахтабыт, кинилэр ааттарыгар сүгүрүйэбит.

Ол курдук олунньу 25 күнүгэр "75 үтүө дьыала" акция Улуу Кыайыы күнүгэр диэри 75 хонук хаалбытын бэлиэтиир тэрээһин буолан ааста. Халандаары арыйда уонна сүрдээх дириҥ ис хоһоонноох ахтыыны оҥордо РФ суруналыыстарын Сойууһун чилиэнэ, кыраайы үөрэтээччи, сэрии кэмин оҕото, нэһилиэк Бочуоттаах олохтооҕо Портнягин Г.Г. Нэһилиэк дьаһалтатын аатыттан эҕэрдэ тылы эттэ баһылык солбуйааччыта Портнягин И.Г., нэһилиэк библиотекаря Платонов А.Г. Кыайыы 75 сылыгар аналлаах оҕолор сэҥээриилэрин ылар (медиапрезентациялаах) иһитиннэрии одҥордо. Ону тэҥэ Улуу Кыайыы 75 сылыгар анаан нэһилиэкпит "Эйэҕэс эбээлэр", "Булчуттар" түмсүүлэрин кытары сыл устата ыытыллар тэрээһиннэргэ былаан ылыныллан үс өттүттэн бигэргэтэн илии баттаһыыта буолбута.